ಮಂಗಳವಾರ, ಏಪ್ರಿಲ್ 27, 2010

ನನಗಿಷ್ಟ ...ನಿಮಗೂ ಇಷ್ಟವಾಗಿದ್ದು ....

ಭಯ್ಯ ಒಂದು ಪ್ಲೇಟ್ ಕೊಡಿ ...
ಖಾರ ಸ್ವಲ್ಪ ಜಾಸ್ತಿ (ಕೆಲವರು ಕಮ್ಮಿ) ಹಾಕಿ...
ನನಗೆ ಸ್ವೀಟ್ ಪಾನಿ ಬೇಡ , ಖಾರ ಪಾನಿ ಕೊಡಿ ....
ಭಯ್ಯ ನನಗೆ ನಾಲ್ಕು ಪೂರಿ ಪಾನಿ ಕೊಡಿ,ಮತ್ತೆ ನಾಲ್ಕು ಸೂಖಾ(ಪಾನಿ ಇಲ್ಲದೆ ) ಕೊಡಿ...

ಭಯ್ಯ ಇನ್ನೂ ಏಳೇ ಪೂರಿ ಆಗಿರೋದು..ಇನ್ನೂ ಒಂದು ಬಾಕಿ ಇದೆ...

ಸ್ವಲ್ಪ ಪಾನಿ ಕೊಡಿ....

ಹ್ಮ್ಮ್ ...ಹೌದು ..ನಾನು ಯಾವುದರ ಬಗ್ಗೆ ಮಾತಾಡುತ್ತಿದ್ದೀನಿ ಅಂತ ನಿಮಗೆಲ್ಲರಿಗೂ ಗೊತ್ತಾಗೇ ಇರುತ್ತೆ..
ನಿಮ್ಮ guess ಸರಿಯಾಗಿದೆ.

ನಾನು ಹೇಳ ಹೊರಟಿರುವುದು ಎಲ್ಲರಿಗೂ ಪ್ರಿಯವಾದ, ಇಷ್ಟವಾದ , ಬಾಯಲ್ಲಿ ನೀರೂರಿಸುವ , ಒಂದು ತಿಂದರೆ ಮತ್ತೆ ಮತ್ತೆ ತಿನ್ನಲೇ ಬೇಕು ಎನಿಸುವ 'ಪಾನಿ ಪೂರಿ' ಅಥವ 'ಗೋಲ್ ಗಪ್ಪ' ಬಗ್ಗೆ. ಮನೆಯಲ್ಲಿದ್ದಾಗ ಸಲೀಸಾಗಿ ಅಮ್ಮ ಮಾಡಿದ ತಿಂಡಿ ಅಷ್ಟೇ ತಿಂದು ಅಭ್ಯಾಸವಾದ ನನಗೆ ಬೆಂಗಳೂರಿಗೆ ಬಂದ ಮೇಲೆ ಇದುವರೆಗೂ ಬೇಸರವಾಗದ, ಎಷ್ಟು ತಿಂದರೂ ಮತ್ತೆ ತಿನ್ನಬೇಕು ಅಂತ ಅನಿಸುವ ತಿಂಡಿ ಗೋಲ್ ಗಪ್ಪ .ಯಾವಾಗಲು ಗೊಲ್ಗಪ್ಪದ ಅಂಗಡಿಗಳಿಗೆ ಹೋಗಿ ಎರಡು ಮೂರು ಪ್ಲೇಟ್ ತಿಂದು ಬರುತ್ತಿದ್ದ ನನಗೆ , ಮೊನ್ನೆ ಇದ್ದಕ್ಕಿದ್ದಂತೆ ಈ ಗೊಲ್ಗಪ್ಪದ ಬಗ್ಗೆ ಒನ್ ತರಹದ ಕುತೂಹಲ ಶುರುವಾಯಿತು. ಸರಿ ಇನ್ನೇನು ಮಾಡುವುದು , ಇದ್ದೇ ಇದೆಯಲ್ಲ ಅಂತರ್ಜಾಲ ಹುಡುಕಿ ಒಂದಷ್ಟು ಮಾಹಿತಿ ಕಲೆಹಾಕಿ ನಿಮ್ಮೆದುರಿಗೆಇಡುವ ಪ್ರಯತ್ನ..

ಎಲ್ಲರಿಗೂ ತಿಳಿದಿರುವಂತೆ "ಪಾನಿ ಪೂರಿ" ಅಥವ "ಗೋಲ್ ಗಪ್ಪ " ತಿನ್ನಲು ಬಲು ರುಚಿ. ಇದನ್ನು "ಬತಾಶ" , "ಗುಪ್ ಶುಪ್" ಅಂತ ಕರೆಯುವುದೂ ಉಂಟು. ಗೋಲ್ ಗಪ್ಪ ಅಂತ ಯಾಕೆ ಹೆಸರು ಬಂತು ಅಂತ ಹೇಳಿದ್ರೆ ಗೋಲ್ ಅಂದ್ರೆ ಉರುಟಾದ , ಅಥವ ಗುಂಡಾಕಾರ ಅಂತ, ಗಪ್ಪ ಅಂದ್ರೆ 'ಗಪ್' ಅಂತ ಒಂದೇ ಗುಟುಕಿನಲ್ಲಿ ತಿನ್ನುವುದು ಅಂತ . ಅದಕ್ಕೆ ಗೊಲ್ಗಪ್ಪ ಅಂತ ಹೆಸರು ಬಂದಿದ್ದಂತೆ. ಹಾಗೇ ಪಾನಿ ಅಂದರೆ ನೀರು( ಇದನ್ನು ಹುಣಿಸೆ ಹುಳಿ ಇಂದ ತಯಾರುಮಾಡಲಾಗುತ್ತದೆ. ಒಂದು ಪಾತ್ರೆಯಲ್ಲಿ ಸಿಹಿ ಹಾಕಿ, ಮತ್ತೊಂದರಲ್ಲಿ ಖಾರ ಹಾಕಿ ಇಟ್ಟಿರುತ್ತಾರೆ) . ಪೂರಿ ಅಂದರೆ ಗೋಧಿ ಅಥವ ಮೈದಾ ಹಿಟ್ಟಿನಿಂದ ತಯಾರಾದ ತಿಂಡಿ. ಅದಕ್ಕೆಂದೇ ಪಾನಿ ಪೂರಿ ಅಂತನೂ ಕರೆಯುವುದು.


ಪಾನಿ ಪೂರಿ ಅಂಗಡಿಗೆ ಹೋಗಿ ನಿಂತಾಗ ಅಂಗಡಿಯಾತ ಕೈಗೊಂದು ಎಲೆಯ ಅಥವ ಪ್ಲಾಸ್ಟಿಕ್ ತಟ್ಟೆಯನ್ನು ಕೊಟ್ಟು , ಒಂದೊಂದು ಪಾನಿ ಪೂರಿಯನ್ನು , ನಡುವೆ ಭಾರಿ ನಾಜೂಕಾಗಿ ತೂತು ಮಾಡಿ ಅದರಲ್ಲಿ ಬೆಂದ ಬಟಾಟೆ , ಕಡಲೆಕಾಳು, ದನಿಯಾ ಸೊಪ್ಪು, ಉಪ್ಪು,ಖಾರ, ಚಾಟ್ ಮಸಾಲ, ಈರುಳ್ಳಿ ,ನಿಂಬೆ ಹುಳಿ ತುಂಬಿ ,ಆಮೇಲೆ ಅಲ್ಲೇ ಪಾತ್ರೆಯಲ್ಲಿ ತುಂಬಿತ್ತ ನೀರು (ಪಾನಿ)ಯನ್ನು ತುಂಬಿಸಿ ನಮ್ಮ ತಟ್ಟೆಯಲ್ಲಿ ಹಾಕುತ್ತಿದ್ದರೆ ಆಹಾ !, ಒಂದೇ ಗುಟುಕಲ್ಲಿ ತಿಂದು ಮುಗಿಸಲು ಎಷ್ಟು ಸಂತಸವಾಗುತ್ತದೆ . ತಿನ್ನಲು ಚುರುಕಾಗಿರಬೇಕಷ್ಟೇ !!.

ಈ ಗೋಲ್ ಗಪ್ಪ ಎನ್ನುವುದು ವಿಕಿಪೀಡಿಯ ಪ್ರಕಾರ ಮೂಲತಃ ಉತ್ತರ ಪ್ರದೇಶದ 'ಬನಾರಸ್' ಎಂಬ ಊರಿನಿಂದ ಬಂದಂತ್ತದ್ದು. ತುಂಬಾ ಜನ ಉತ್ತರ ಭಾರತದವರು ಬೆಂಗಳೂರಿನಲ್ಲಿ ಬಂದು ನೆಲೆಸಿದ್ದರಿಂದ ಅದು ಬೆಂಗಳೂರಿನಲ್ಲಿ ಪ್ರಸಿದ್ದಿ ಪಡೆದಿದೆ. ಗೊಲ್ಗಪ್ಪದಲ್ಲಿರುವ ಹಲವಾರು ಮಸ್ಸಾಲೆ ಪದಾರ್ಥಗಳು ಕೆಮ್ಮು, ನೆಗಡಿ, ಹಾಗೂ ಸೈನಸ್ ನಿವಾರಿಸುವ ಗುಣವನ್ನು ಹೊಂದಿದೆ.
ಮಳೆ ಬಂದು ನಿಂತ ಮೇಲೆ ಹೊರಗೆ ಹೋಗಿ ಪಾನಿ ಪೂರಿ ತಿನ್ನುವಲ್ಲಿನ ಆನಂದವೇ ಬೇರೆ!!! ಹಾಗಾದ್ರೆ ಯಾಕೆ ತಡ ಮಾಡ್ತೀರ ?? ಇವತ್ತೇ ಹೋಗಿ ಗೋಲ್ ಗಪ್ಪ ತಿನ್ತೀರಾ ಅಲ್ವಾ??

ಶುಕ್ರವಾರ, ಏಪ್ರಿಲ್ 23, 2010

ಆಮಂತ್ರಣ..... :)

ಮೊದಲಬಾರಿಗೆ ನನ್ನ ಬ್ಲಾಗ್ನಲ್ಲಿ ನಿಮಗೆಲ್ಲರಿಗೂ ಪುಸ್ತಕ ಬಿಡುಗಡೆಯ ಕಾರ್ಯಕ್ರಮಕ್ಕೆ ಆಮಂತ್ರಣ..... :)
ಹೌದು.. ನಾಳೆ "ಸಾಂಗತ್ಯ" ಪುಸ್ತಕ ಬಿಡುಗಡೆಯಾಗುತ್ತಿದೆ
ದಯವಿಟ್ಟು ಎಲ್ಲರೂ ಈ ಕಾರ್ಯಕ್ರಮಕ್ಕೆ ಪಾಲ್ಗೊಂಡು ಕಾರ್ಯಕ್ರಮವನ್ನು ಯಾಶಸ್ವಿಯಾಗಿಸಬೇಕು ...
ನೀವೆಲ್ಲರೂ ಬನ್ನಿ ..ನಿಮ್ಮವರನ್ನೂ ಕರೆತನ್ನಿ...
ಬರ್ತೀರಲ್ಲ ?? ತಪ್ಪಿಸಬೇಡಿ ಪ್ಲೀಜ್..... :-)
ದಿವ್ಯಾ :)




ಸೋಮವಾರ, ಏಪ್ರಿಲ್ 12, 2010

ಹೃದಯಕ್ಕೆ ಮನೆ ಸಿಕ್ಕಿದೆ......

ಒಂದು ಕಾಲದಲ್ಲಿ,
ಹೃದಯ ಕಲ್ಲಾಗಿತ್ತು...

ತನ್ನ ಮನೆಯನ್ನು ಕಳೆದುಕೊಂಡು

ನಿರ್ಗತಿಕವಾಗಿತ್ತು, ರೋಧಿಸುತಿತ್ತು..


ಯಾರನ್ನೂ ಪ್ರೀತಿಸಲಾರದೆ ,

ದ್ವೇಶಿಸಲೂ ಆಗದೆ ಸುಮ್ಮನಿತ್ತು.

ಆಗ ಕಂಡಿದ್ದು ಅವನು ,

ಹೃದಯ ಕಂಡುಕೊಂಡ ಮನೆ ಅವನದು.....


ಕಲ್ಲು ಹೃದಯವಿದು ಹೂವಾಗಿದೆ ,
ಸಂತಸದ ಸಮಯ ಸಮೀಪಿಸಿದೆ,

ಹೃದಯಕ್ಕೀಗ ಲವಲವಿಕೆ ಬಂದಿದೆ,

ಪ್ರೀತಿಯ ಹೂವು ಅರಳಿದೆ ....

ಹೃದಯವೀಗ ಪ್ರೇಮ ಗೀತೆ ಹಾಡುತ್ತಿದೆ,

ಹಕ್ಕಿಯಂತೆ ಹಾರುತ್ತಿದೆ,

ಸಂತಸದಿಂದ ನಲಿಯುತ್ತಿದೆ.

ಹೃದಯಕ್ಕೀಗ ಮನೆ ಸಿಕ್ಕಿದೆ......

(ಚಿತ್ರಕೃಪೆ: ಅಂತರ್ಜಾಲ)